Henry Ford

Dr Henry Ford (* 30. Juli 1863 in Greenfield Township (Michigan), USA; † 7. April 1947 z Dearborn, Michigan) het dr Automobilhersteller Ford Motor Company gründet. Er het d Fliessbandtechnik im Automobilbau perfekzioniert, wo dr Ransom Eli Olds scho 1902 in ere äifachere Form in sinere Autifirma Oldsmobile iigfüert ghaa het. D Arbäiter bi dr Ford Motor Company häi acht Stunde am Daag gschafft und scho 1913 e Loon vo fümf US-Dollar im Daag übercho, was dütlig mee gsi isch, as sust üüblig. Im Ford si Konzept vo dr modärne Herstellig vo Faarzüüg het nit nume die industrielli Produkzioon revoluzioniert, sondern het au e starke Iifluss uf die modärni Kultur ghaa (Fordismus). Näbe dere Pionierarbet für e Autibau het dr Ford immer wider antisemitischi Schrifte wie The International Jew uusegee, wo e groossi Wirkig gha häi, und er isch bis hüte wäge däm politisch umstritte.